上次提及冠軍騎師戰況再度激烈起上來之際，突然來個反高潮就是莫雷拉心律不正常要退下火線，先希望雷神健康無大礙，但筆者一再提及馬季冗長，名義上馬匹多了出賽機會，先不論在投注上要估邊場先係攻堅，但對於馬口不多的「香港馬」健康是否真有利呢? 再結合現時一旦遲熟嘅馬匹眨眼就減分跌入五班，之後好快又退役，久而久之的問題一季唔見，兩季唔見，再過多幾季浮現晒出黎，到時就要諗計或為時已晚。
第二場 四班 (40-60分) 1200米 草地
「勇敢夢想」在總場次(551) 於彎位走三疊兼蝕慢步速之下可撲近主馬群的能力，相近似跑法的「鼓浪順風」以及「鈁糖武士」之後亦已上名，然而今場亦具前速馬匹，估計會有正常步速會合此駒發揮。
「魅力寶駒」剛戰三甲馬沿途均走內欄節省腳程，所以全程走三疊相對蝕腳程的牠，最終跑入殿軍的表現已算不俗。
「喜盈於心」前仗突加面箍落敗，上仗除去面箍但初跑谷草，兩仗落敗都有點藉口。兜轉後再返田草上陣，換回賠率不妨再給予機會。
「誠心所願」近仗無疑比較失望，但上仗慢步速沿途殿後可當跟跑敗績一場而已，以大前仗跑千四負於「烈風」「萬市之光」兩馬位的表現，套諸今場或已夠用。
第三場 四班 (40-60分) 1650米 泥地
今場有數匹跑開短途賽駒增程而臨，或可能為早段帶來正常偏快步速。所以主力向中置型馬匹埋首。
「博愛友威」上仗沿途走內中內檔受制慢步速無法起動輸蝕形勢，相信用力亦唔多。今仗雖然初跑田泥，但早前兩課濕慢泥閘見肯追，相信至少唔怕食泥，未有泥地績唔代表唔識跑，有賠率可敲。
「印水紙」連續五場跑此程取得一冠兩亞兩季，六歲馬在大勇之境，今場排檔仍好，跑法彈性的牠復課快跳仍躍躍欲試，故核心範圍未可言棄。
「錶之皇者」近兩仗轉跑此程均有不俗走勢，終於搵到出路，賽前再有大閘砥礪，馬房散倉在即兼未交代相信戰意最旺盛。
「麒麟」近兩仗轉上從化操練帶來成效，而且一再轉換路程都有走勢，估計馬兒找到評分反彈位，泥地同程季內亦曾展現走勢，可以兼顧。
第四場 四班 (40-60分) 1400米 草地
「彩虹之光」近兩仗雖然大致無跑錯，但所遇對手相對今場亦偏強，而剛戰賽事時間不俗，拆組後對手減弱，唔轉程心意明顯，有力補中。
「鹿鼎記」即使父母兩線都傾向中距離會更好，但馬兒上仗畢竟是初跑千四，在沿途步速亦偏快，後上馬操控的大局的情況下少負三乘許已算不俗。
「遨遊之星」同樣出自總場次(723)而跑入一席季軍的牠，是前置馬中表現最好一匹，今場快馬唔多，隨時賺回形勢。
「木火兄弟」剛戰快閘但人馬角力，而且有點車前倒後的味道，最終才回身撲近主馬群的表現絕不差，埋門再跳三段練氣兼再報千四，可望更進。
第九場 二班 (80-100分) 1400米 草地
「美麗在線」出道至今七戰取四勝兩位，馬性忠心準繩。而今仗少負十一磅兼排外檔相信更易切入內欄角逐，有力再贏。
「少爺仔」一再於劣勢下追入以快末段時間追入位，四歲馬狀態展期見勇，核心範圍亦未可輕易言棄。
「中華盛景」上仗同樣蝕慢步速的牠，雖然名次上不及「少爺仔」，但在多讓十磅兼更被頂至三疊出彎之下，最終跑入季軍的表現亦不可看輕。
「知道再勝」同樣在(730) 場次上陣，表面名次平平無奇，但直路上騎者取位心意及際遇一般，但末段輕騎下馬兒有勢頭下收復失地，今戰再對壘未必下風。
(波仔 25/06/2022)
댓글