全神貫注一網打盡

第二場 第五班 (0-40分) 1200米

「全神貫注」本身並非好材料，上仗起步因意外而留後跑，入直路喺外欄越衝越有，走勢甚為貫注。今仗檔位大幅內移，相信會放喺較前位置競跑，如能跟守內欄二、三位入直路，以上仗嘅後勁，絶對有力走入前列，甚至贏馬。

「前風」今季多次係末段跑岀快時間，呢匹七歲馬雖然未再有進步，但勝在實而不華。前仗係同程蝕住慢步速情況下，結果追入一席第三。上仗泥地落敗不足為據，再報跑此程應求交代，可作副選。

「可愛新星」上仗與「前風」同場，當時亦係蝕住慢步速，以及走住二叠後上贏馬，表現尚算吸引。賽後操練工夫正常，此駒如臨場非大熱門，應有一定討價還價之力，依然有力走入三甲之馬。

「快樂奇兵」長期係四班角逐而未有好表現，跑得最好嘅一次係今季 144場次跑入第三，現時評分下調至新低，估計係五班會有點微利，惟始終未有過真正表現，只而作配。

第四場 第四班 (40-60分) 1200米

「激光諜影」上仗插班初岀即跑入一席第三，睇番該場嘅頭兩段時間，雖然比另一組四班千二稍慢，但依然比標準時間為快，屬快步速受害者，末段時間亦不錯。蔡廄馬初岀見好要防，匆匆再岀有權立即補中。

「幸運多彩」上年十一尾開始喺從化做工夫，期間大、細閘均做足，埋門呢兩星期每星期各試一課草閘，似有心一岀即拼。雖然同母馬應遍向長途發展，但始終三歲馬初岀呢程合理，可作配腳。

「鼓浪高升」上仗由於排較外檔關係留後跑，沿途走住三疊之餘，入直路走住外欄衝，但一直未能望空，到最後二百米才可展開衝刺，可惜未能走入較佳名次。賽後從化重新做工夫，埋門試閘走勢岀色，有力收復前失。

「馬鳳凰」上仗雖然喺群駒密隴嘅情況下贏馬，但勝在姿態尚算不錯。縱使賽事水準未必高，但環顧今場對手多屬似是而非之輩，對於呢匹識贏嘅馬可能會佔一定程度優勢，仍然要兼顧作配。

(波仔 2/3/2025)